No contexto do rural, a difusión da igualdade de
oportunidades entre homes e mulleres é especialmente difícil, pois persiste en
moitos casos unha gran mentalidade machista, nas que as tarefas e as
iniciativas das mulleres non son valoradas merecidamente, e o seu traballo vese
como unha extensión do traballo doméstico. Na miña opinión, o desenvolvemento
da Costa da Morte non pode ser entendido sen darlle á muller o papel que lle
corresponde neste proceso, que creo que é fundamental.
Gustaríame falar dunha iniciativa moi importante
no eido da igualdade de xénero na nosa comarca, que é a que está a desenvolver
a Asociación de Mulleres de Camariñas pola Igualdade. Esta asociación comeza a
súa andadura en decembro de 2008, formada por un grupo de mulleres cuxo
obxectivo é o de loitar por mellorar a igualdade de oportunidades entre homes e
mulleres, con especial énfase na sociedade de camariñá. Deste xeito, a asociación
intenta dinamizar o compromiso coa igualdade entre mulleres e homes, loitar contra a
violencia machista e mellorar a vida das mulleres que viven no rural.
A Asociación de Mulleres de Camariñas pola
Igualdade realiza numerosas actividades de gran interese social ademais das concentracións
con motivo do Día da Muller Traballadora. Exemplo destas actividades son as Xornadas
de Experiencias de Mulleres Emprendedoras que tiveron lugar o pasado ano e nas
cales se pretendían difundir experiencias no marco do desenvolvemento e
emprendemento feminino na comarca, e os Premios “Muller pola Igualdade” nos que
se pretende render unha homenaxe a mulleres que contribuíron a dignificar a
figura da muller camariñá.
Penso que no eido do desenvolvemento do rural, o
papel desta Asociación é moi importante, porque con estes proxectos contribúese a difundir
unha imaxe máis moderna da muller, máis independente e máis emprendedora, na
que se teñen que ver reflectidas todas as mulleres, e axuda a cambiar a
mentalidade existente que está a limitar a igualdade de oportunidades.
Pensades que a muller no medio rural está igual de
valorada e ten as mesmas oportunidades que no medio urbano? Que credes que acontece
na Costa da Morte? Credes que iniciativas como as levadas a cabo pola
Asociación de Mulleres de Camariñas pola Igualdade son importantes para
dignificación da muller? Que actividades ou proxectos propoñedes para fomentar
a igualdade entre homes e mulleres?
Moi interesante. Quén lidera a dita asociación? por que se creo e como? como se mantén? ten vinculación política? xorden interrogantes. Suxiro unha entrevista en profundiade coa presidenta.
ResponderEliminarCales son obxectivos desta asociación? e cales foron os seus logros?
É moi importante crear asociacións deste tipo co fin de superar unha barreira coa a desigualdade sexual nun eido ao que, de por si, é difícil chegar. Por suposto que a muller no rural non está igual de valorada. Sen ir máis lonxe, e tras unha simple observación do meu entorno, a maioría das mulleres non teñen carné de conducir, non son co-propietarias das explotacións agrícolas, etc., o cal é imprescindible para a súa independencia social e económica. Algunha iniciativa que se deu, pero que aínda non logrou o seu cumio, foi a proposta da cotitulariade compartida, que primaba economicamente aquelas explotacións ou empresas familiares nas que ambos membros eran titulares. Por desgracia, moitas delas non se acolleron á iniciativa. Se queremos desenvolvemento rural, a igualdade é un paso imprescindible.
ResponderEliminarGrazas pola suxestión da entrevista. De feito xa lla fixen á súa secretaria e informarei sobre todos eses interrogantes en vindeiras entradas.
ResponderEliminarCon respecto ao teu comentario, Marta, paréceme moi interesante a túa observación, porque a verdade é que o problema da titularidade das explotacións era descoñecido para min, e penso que é un eido, ao igual que en tantos outros, no que se debería avanzar. Penso que en cuestións coma esta, organizacións como a que hai en Camariñas son fundamentais polo seu achegamento ás mulleres que habitan no medio rural e polo seu importante labor de difusión.
A problemática do carné de conducir é bastante frecuente, tamén na miña zona. Persoalmente, penso que nun territorio tan disperso como é o rural galego, o carné de conducir é un elemento fundamental xa que dá á persoa que o posúe unha maior independencia. O feito de que moitas mulleres carezan del é indicativo da baixa autonomía que teñen as mulleres neste medio. Creo que este é un asunto sobre o que as asociacións de mulleres estaría ben que incidisen.