A entrada de hoxe é moi especial, xa que tiven a gran
oportunidade de lle facer unhas preguntas a Déborah Morate Núñez, secretaria da Asociación de Mulleres de
Camariñas pola Igualdade da cal falei nunha entrada anterior, e que está a
realizar unha importantísima labor en prol da igualdade de xénero nesa
localidade. Dende aquí aproveito para darlle as grazas por atenderme tan amablemente. A continuación expoño en
detalle a entrevista, coa que persoalmente aprendín moito e coa que estou
segura de que vós tamén o faredes.
P. Cres que a muller no medio rural
está igual de valorada e ten as mesmas oportunidades que no medio urbano?
R. Non, de entrada no medio urbano
a muller ten máis acceso a formación, traballo, ocio, etcétera. Ademais é unha maneira de vivir máis
independente e persoal, mentres que no medio rural a vida da muller é máis
pública e polo tanto sufre de máis presión da sociedade. A valoración da muller
no medio rural tamén é distinta xa que en moitos sitios só se contempla a súa
labor doméstica, aínda non se entende que a muller poida necesitar algo máis
que a familia para sentirse realizada.
P. Dende a túa posición na asociación, percibes moito
machismo no entorno de Camariñas e da Costa da Morte en xeral?
R. Desgraciadamente o machismo
aínda é moi común, e iso que na maioría dos pobos pesqueiros vivimos nunha
sociedade matriarcal, na que a muller carga non só co peso da familia senón co
de moito traballo, inclusive na economía familiar. Pero ao mesmo tempo na
maioría dos pobos pesqueiros séguese a ter unha maneira de pensar moi pechada,
na que aínda que a muller traballe tanto ou máis que o home e teña que tomar
moitas decisións ela soa, pola ausencia do home, que esta no mar, non se
valoriza o seu traballo e segue estando en segundo lugar. A muller ten que
facer todas esas cousas porque "é o seu deber", e así as educan polo
que aínda seguimos moi atrasados nese punto en comparación coas cidades ou
pobos máis grandes.
Nesta comarca o primeiro paso
para a igualdade que estamos levando a cabo, non é educar aos homes para a
igualdade, senón que estamos empezando polas mulleres, para que moitas delas
que aínda non o saben, descubran que hai outra forma de vivir.
P. Cales son, ao teu xuízo, as principais trabas coas que se
atopan as mulleres na Costa da Morte?
R. A
formación e o ocio, neste caso, a maioría do ocio destinado ás mulleres só
contempla actividades popularmente destinadas ás mulleres como costura e o bordado.
Ademais tamén son moi importantes os problemas para conciliar a vida laboral e
familiar e outros.
P. Cres que a situación de desigualdade de oportunidades
entre homes e mulleres tende a reducirse co paso dos anos?
R. Grazas a Deus que si, o que pasa é que é un camiño moi,
moi longo, e os pasiños son moi, moi pequeniños. Con todo, a desigualdade non
se reduce por si soa co paso do tempo, senón que creo que con cada actividade
que facemos nós ou calquera outra entidade vanse abrindo camiños e facendo
adiantos, aínda que só logremos facer pensar a xente, eu considero que por
pouco que se faga, sempre é un graíño de area que se arrima á montaña.
P. Falando da importante labor que estades a desenvolver na vosa asociación, que
proxectos ides levar a cabo proximamente?
R. Imos
realizar unhas xornadas de mulleres emprendedoras, pero dándolle unha
orientación moi distinta ás que celebramos ano pasado. Tamén imos levar a cabo
unha campaña de sensibilización contra a violencia de Xénero ao longo do mes de
novembro, e polo de agora, que estea concretado, nada máis, pero estamos
abertas a distintas posibilidades.
Déixovos o enlace á web da Asociación de Mulleres de Camariñas pola igualdade, onde podedes atopar moita información sobre a mesma e as súas máis que interesantes iniciativas.
