A Costa da Morte véndese?

O marketing territorial é un concepto relativamente novo, que nace do “matrimonio” entre a Xeografía Humana e a Ciencia Económica. Trátase dunha ferramenta moi útil que ten como obxectivo a busca do desenvolvemento sostible do territorio sendo a súa finalidade última a satisfacción dos cidadáns, turistas e inversores que demandan o territorio para distintos fins.

Esta técnica consiste en aplicar o marketing tan frecuentemente empregado nas empresas sobre un territorio, que pode ser un Estado, unha rexión ou unha cidade. Baséase na idea de que os territorios compiten por recursos financeiros e humanos con outro territorios para compracer aos seus cidadáns e atraer clientes e inversores.  A única diferenza co marketing empresarial é que no caso do marketing territorial as plusvalías xeradas repártense colectivamente, polo que podemos dicir que se trata dunha ferramenta que está ao servizo do ben común.

O marketing territorial promove a identidade do territorio, xa que é unha condición necesaria para poder emprender un proxecto colectivo destas características, e por tanto crear unha imaxe de marca-territorio que se vincule a un sentimento ou a un determinado estilo de vida. Deste xeito, o territorio convértese nun produto, e se crea no consumidor ganas de consumilo.

A Costa da Morte podería ser un bo lugar que vender a cidadáns en xeral, investidores e a turistas, xa que ten un gran potencial de recursos que non están todo o explotados que deberían. Nunha zona como é a nosa comarca, que está a perder poboación, na que a xente xove emigra para encontrar un futuro mellor e na que non hai iniciativas empresariais que dinamicen a economía, o marketing territorial pode ser unha boa alternativa. Crear unha marca Costa da Morte coa que todos os habitantes, institucións e empresas nos identifiquemos e coa que transmitamos o noso estilo de vida pode ser a chave do desenvolvemento da bisbarra e, quizais, un paso cara a igualdade de oportunidades entre homes e mulleres.

Credes que o marketing territorial sería unha boa opción para contribuír ao desenvolvemento da Costa da Morte? Existe na nosa comarca a identidade territorial necesaria para aplicar este instrumento? Pensades que a aplicación do marketing territorial na Costa da Morte tería efectos sobre a igualdade entre homes e mulleres?

Existe igualdade de oportunidades entre homes e mulleres no rural? A Asociación de Mulleres de Camariñas

No contexto do rural, a difusión da igualdade de oportunidades entre homes e mulleres é especialmente difícil, pois persiste en moitos casos unha gran mentalidade machista, nas que as tarefas e as iniciativas das mulleres non son valoradas merecidamente, e o seu traballo vese como unha extensión do traballo doméstico. Na miña opinión, o desenvolvemento da Costa da Morte non pode ser entendido sen darlle á muller o papel que lle corresponde neste proceso, que creo que é fundamental.

Gustaríame falar dunha iniciativa moi importante no eido da igualdade de xénero na nosa comarca, que é a que está a desenvolver a Asociación de Mulleres de Camariñas pola Igualdade. Esta asociación comeza a súa andadura en decembro de 2008, formada por un grupo de mulleres cuxo obxectivo é o de loitar por mellorar a igualdade de oportunidades entre homes e mulleres, con especial énfase na sociedade de camariñá. Deste xeito, a asociación intenta dinamizar o compromiso coa igualdade  entre mulleres e homes, loitar contra a violencia machista e mellorar a vida das mulleres que viven no rural.

A  Asociación de Mulleres de Camariñas pola Igualdade realiza numerosas actividades de gran interese social ademais das concentracións con motivo do Día da Muller Traballadora. Exemplo destas actividades son as Xornadas de Experiencias de Mulleres Emprendedoras que tiveron lugar o pasado ano e nas cales se pretendían difundir experiencias no marco do desenvolvemento e emprendemento feminino na comarca, e os Premios “Muller pola Igualdade” nos que se pretende render unha homenaxe a mulleres que contribuíron a dignificar a figura da muller camariñá.

Penso que no eido do desenvolvemento do rural, o papel desta Asociación é moi importante, porque  con estes proxectos contribúese a difundir unha imaxe máis moderna da muller, máis independente e máis emprendedora, na que se teñen que ver reflectidas todas as mulleres, e axuda a cambiar a mentalidade existente que está a limitar a igualdade de oportunidades.

Pensades que a muller no medio rural está igual de valorada e ten as mesmas oportunidades que no medio urbano? Que credes que acontece na Costa da Morte? Credes que iniciativas como as levadas a cabo pola Asociación de Mulleres de Camariñas pola Igualdade son importantes para dignificación da muller? Que actividades ou proxectos propoñedes para fomentar a igualdade entre homes e mulleres? 

A orixe do Centro de Coñecemento da Costa da Morte

Nunha entrada anterior xa tiña falado do último proxecto da Asociación Neria, o Centro de Coñecemento da Costa da Morte (c3M). Este centro nace coa finalidade de achegar a innovación, tecnoloxía e TIC´s á cidadanía, empresarios e novos emprendedores. Así, o c3M vai a ser un espazo aberto e colaborativo, no cal se reúnan e relacionen os intereses da cidadanía, empresa, docencia e investigación tendo en conta as necesidades dos distintos grupos sociais e os emprendedores.

O Centro de Coñecemento da Costa da Morte está inspirado noutro centro que se puxo en marcha en 1997 en Cornellá de Llobregat (Barcelona),  o centro Citilab. O c3M intenta, deste xeito,  adaptar a filosofía desa iniciativa ao territorio e ás necesidades da Costa da Morte. Así, Citilab é unha mestura entre centro de formación, centro de investigación e viveiro de iniciativas empresariais e sociais, que ten como obxectivo a difusión e fomento da sociedade do coñecemento, de xeito que a Internet é considerada como un medio de innovación de carácter colaborativo e integrador no que o cidadán é o centro do proceso. Convídovos a ver este vídeo no cal Jose Antonio Gálaso, responsable de proxectos de citilab da máis detalles sobre esta iniciativa.

En canto ao financiamento do Centro de Coñecemento da Costa da Morte, o proxecto nace cofinanciado polo Plan Avanza do Ministerio de Industria, que aporta 1,2 millóns de euros. Con todo, o obxectivo é que este centro poida autofinanciarse. Así, espérase que o financiamento do c3M proveña de varias fontes como proxectos de concurrencia competitiva en convocatorias a nivel autonómico, estatal, europeas e iberoamericanas, convenios con empresas e organismos públicos, acordos con empresas para desenvolver iniciativas mediante modelos de coxestión e servizos baseados na innovación que respalden proxectos emprendedores.

No caso do colectivo de mulleres da Costa da Morte, creo que este proxecto pode beneficialas dun xeito moi especial, xa que aínda hai moitas que non están familiarizadas cas novas tecnoloxías, e que poderán aproveitar as vantaxes da sociedade do coñecemento co apoio deste centro, e quizais emprender novos proxectos que enriquezan o noso entorno.

Que opinades desta iniciativa? Credes que o c3M na Costa da Morte será quen de levar a cabo unha iniciativa similar á de Citilab en Cornellá? Como valorades o feito de que o c3M queira autofinanciarse e non depender integramente de axudas de carácter público?