O proxecto Granxa Familiar

Esta iniciativa é un gran exemplo de como as novas tecnoloxías poden contribuir á mellora no desenvolvemenento do medio rural, e por tanto, influír positivamente na calidade de vida das persoas que residen neste entorno. Na súa páxina web, http://www.granxafamiliar.com, podedes atopar toda a información relativa a este proxecto.

O proxecto Granxa Familiar nace no 2008 como consecuencia dunha investigación levada a cabo polo GIS-T  do IDEGA, da Universidade de Santiago de Compostela, na cal faise patente a importancia que teñen para moitas familias da nosa terra as rendas que obteñen da comercialización de parte da súa produción agraria.

Esta iniciativa ten como obxectivo solucionar o problema do inxusto tratamento que reciben as familias produtoras agrarias por parte dos intermediarios, os cales adquiren os seus produtos a prezos ínfimos e véndenos ao consumidor final a uns prezos moi elevados, apropiándose das rendas do agricultor.

Deste xeito, Granxa Familiar pretende establecer canles de información e de transmisión de rendas entre o medio rural e o urbano, contribuíndo a mellorar o benestar tanto das familias agrarias, que ven como o seu traballo é dignificado e xustamente valorado, como dos compradores, que obteñen alimentos frescos, de máxima calidade e a uns prezos inferiores aos que os poderían atopar en calquera establecemento.

Persoalmente, penso que os beneficios deste proxecto non se limitan unicamente a unha mellora da situación das familias propietarias das granxas e dos consumidores, senón que este contribúe a manter a agricultura tradicional, que forma parte da nosa cultura, a nosa idiosincrasia e, en definitiva, a nosa identidade como pobo.

A Costa da Morte é unha rexión eminentemente rural, onde moitas familias comercializan os seus excedentes agrícolas, credes que estarían dispostas a levar empregar as tecnoloxías da información para levar a cabo esta actividade? Que opinades do proxecto Granxa Familiar?

A Sociedade da Información

Segundo Manuel Castells, catedrático de Socioloxía e Planificación Urbana e Rexional na Universidade de Berkeley, a Sociedade da Información é a forma específica de organización social na cal a xeración, o procesamento e a transmisión da información convértense nas fontes fundamentais da produtividade así como do poder, debido ás novas condicións tecnolóxicas que xorden neste período histórico.

Deste xeito, a Sociedade da Información ben podería equipararse á primeira Revolución Industrial, na cal se introduce a tecnoloxía do vapor. A internet, así coma as novas tecnoloxías, non só se introducen de forma transversal nos distintos sectores da economía coma unha forza produtiva directa, senón que constitúen un sector en si mesmo que dá emprego a multitude de persoas e que xera innumerables beneficios tanto económicos coma sociais.

A aparición da internet cambiou a lente coa que ollamos o noso entorno e introduciunos nun mundo totalmente globalizado no cal a información difúndese en décimas de segundo e a distancia xeográfica non supón unha traba na comunicación entre as persoas.  Con todo, e alén destas consideracións, penso que un dos principais beneficios que nos reportan as novas tecnoloxías ten que ver coa súa capacidade de se converteren en instrumentos de innovación, que sexan quen de axudar a resolver os problemas aos que se enfronta a nosa sociedade.

Como credes que poden contribuir as novas tecnoloxías ao desenvolvemento da Costa da Morte? Credes que estes mecanismos poden axudar a mellorar a calidade de vida e se cadra a dinamizar a economía da nosa bisbarra?